Pas dy vitesh përplasje Teatri Kombëtar është shembur në orët e para të ditës së sotme. Ky lajm ka trishtuar gjërësisht gjithë qytetarët, por ata që e ndjejnë më shumë janë vetë artistët, ku shumica e kanë dënuar këtë veprim dhe janë shprehur se sot është dita e tyre më e vështirë.
Nuk ka munguar edhe reagimi i moderatorit të njohur Ardit Gjebrea, i cili gjatë emisionit të tij tek “E diela shqiptare” ka bërë një reflektim përsa i përket kësaj ngjarje të trishtë që ndodhi sot.
Sipas tij shembja e vërtetë është mungesa e kujdesit prej vitesh për artistët.
“Sot dita nisi papritmas me një ngjarje kulturore, që do thoja është edhe politike. Godina e Teatrit Kombëtar u shemb, por shembja e vërtetë është mungesa e kujdesit prej shumë vitesh për komunitetin që ka mbajtur gjallë breza të tërë. Për atë komunitet që ka fituar duartrokitjen, nderim, respekt, por që pas viteve të demokracisë nuk pati kujdesin e një strategjie që të ecte paralel me zhvillimin e biznesit, të ekonomisë dhe të lulëzonte siç artistët vërtetë meritojnë”, u shpreh Ardit Gjebrea.
Arditi theksoi se artistët janë lënë pas dore dhe në harresë.
“Harresa ose lënia pas dore sot solli mëngjesin e sotëm… Është shumë vonë, nuk e mbrojtët dot godinën sepse nuk keni mbrojtur artistët që e kanë mbajtur këtë godinë prej kohësh. Dikur zgërdhinit dhëmbët kur Kryeministri i sotëm bënte batuta për Violeta Manushin, që ishte njësoj sikur të shpotitje një brez që i ka dhënë vlerë mureve që u shembën sot. Kush ka më shumë rëndësi? Muret apo njerëzit? Kush i jep vlerë institucionit? E nëse nuk je kujdesur për ta, e nëse nuk ulërin dhe të vritesh për artistët, është shumë pak sot të mbrosh pasojën e veprën që mban emrin artist teatri. Duhet që politikanët të ndërtojnë një politikë të caktuar për teatrin, të gjithë bashkë, që do të thotë për artistët e teatrit. Duhet që ne të mbushim sallat që ata të marrin frutin e djersës së tyre”, përfundoi ai.
