Revista “Vogue” ka zbuluar temën zyrtare të Met Gala 2025 – një nga netët më të rëndësishme të modës në botë. Ngjarja që mbahet tradicionalisht të hënën e parë të majit, këtë herë do të jetë një homazh për stilin dhe historinë e komunitetit të diasporës afrikane.
Tema e këtij viti titullohet “Superfine: Tailoring Black Style”, dhe është frymëzuar nga libri i studiueses Monica L. Miller, “Slaves of Fashion: Styling Black Diasporic Identity”. Ekspozita përkatëse në Muzeun Metropolitan të Artit në New York do të paraqesë një përzgjedhje unike veshjesh, pikturash dhe fotografish që dokumentojnë evolucionin e dandizmit të zi – një stil që përzien hijeshinë europiane me rrënjët afrikane, si një formë qëndrese kundër racizmit dhe stereotipeve.
Dhe si çdo vit, lista e të ftuarve mbetet sekret, por disa emra të mëdhenj tashmë janë konfirmuar, përfshirë Madonna, Demi Moore, Diana Ross dhe Bebe Rexha.
Prezantuesit e edicionit 2025 përfshijnë Colman Domingo, Lewis Hamilton, A$AP Rocky, Pharrell Williams dhe Anna Wintour, ndërsa LeBron James do të jetë prezantues nderi. Qëllimi mbetet i pandryshuar: mbledhja e fondeve për Institutin e Kostumeve të Met Museum.
Edicioni i kaluar solli temën “Sleeping Beauties: Reawakening Fashion” dhe u organizua nga Bad Bunny, Zendaya, Jennifer Lopez dhe Chris Hemsworth. Çfarë do të na ofrojë këtë vit? Mbetet për t’u parë në natën magjike të 5 majit.
