Reperi i njohur shqiptar, Getinjo, ka ndarë së fundmi mendimet e tij mbi situatën e skenës muzikore dhe vështirësitë që përballojnë artistët që fokusohen te tekstet me përmbajtje të thellë. Në një postim në rrjetet sociale, ai theksoi se nuk është gjithmonë e lehtë të gjesh hapësirë për krijimet që kanë një mesazh të fortë, duke e përshkruar këtë periudhë si “pak e vështirë për tekstshkruesit si unë”.
Reperi u shpreh se përpjekjet për të sjellë diçka origjinale shpesh nuk marrin vlerësimin që meritojnë, duke e krahasuar skenën muzikore me një tokë që “nuk jep frute e as lule” pavarësisht përpjekjeve të artistëve. Megjithatë, ai shtoi se performancat në klube dhe evente mbeten një burim i qëndrueshëm të ardhurash për ata që dëshirojnë të mbajnë jetesën nga muzika.
Getinjo po ashtu theksoi vendosmërinë e tij për të vazhduar të publikojë këngë me “tekste smart dhe reale”, duke i dhënë rëndësi përmbajtjes dhe mesazhit që arrijnë tek publiku. Ai u kujdes të nënvizojë se nuk ka asgjë kundër kolegëve të tjerë të skenës, duke deklaruar se “ka bukë për krejt”, një shprehje që tregon mbështetje dhe respekt për artistët, pavarësisht stilit muzikor.
Me këtë qëndrim, Getinjo vijon të dallojë nga shumë artistë të tjerë që ndjekin trendet më komerciale, duke i dhënë publikut një zë të reflektuar dhe mesazhe që lidhen me çështje sociale dhe emocionale.
