Gazetari shqiptar rezulton me COVID-19, priti ditë të tëra me ankth për përgjigjen e tamponit!

Një gazetar i televizionit ABC News, ka rezultuar pozitiv me koronavirus dhe është karantinuar në një dhomë të shtëpisë së tij ku jeton me të ëmën, tre vajzat dhe bashkëshorten.

Gjergj Figuri nga Lezha, më në fund arriti të marrë përgjigjen e tamponit për Covid-19, katër ditë pasi kreu testin. Ai iu nënshtrua testit të mërkruën dhe deri këtë të diel, qëndroi në ankth në pritje të një përgjigjeje që vonoi shumë.

Një ditë më parë gazetari Gjergj Figuri denoncoi vonesën e  përgjigjes së tamponit në ekranin e ABC News duke treguar të gjithë peripecitë. Figuri publikoi të gjithë telefonatat e kryera me përfaqësues të katër institucioneve të shëndetësisë.

Shenjat e para të dyshimit për Covid-19 i ishin shfaqur ditën e shtunë dhe prej këtij momenti ishte vetëizoluar. Pasi kontaktoi me mjekun e familjes, ky i fundit i sugjeroi të merrte mjekim për dhembje muskulare dhe ibubrofen.

Të hënën  gazetari pati temperaturë të lartë e në këto kushte, mjeku i familjes, pasi u interesua në njësinë e kujdesit shëndetësor, caktoi ditën për kryerjen e tamponit.

Të mërkurën shkoi në spital ku dhe ju mor analiza për Covid-19, por duhet të kalonin 4 ditë dhe vetëm të dielën arriti të marrë përgjigjen, nga e cila rezultoi pozitiv.

Familjarët e tij janë në gjendje të mirë shëndetësore dhe nuk kanë shfaqur shenja të virusit.

/ABC News