Kim Kardashian prej vitesh tashmë ndan me ndjekësit në rrjetet sociale momente delikate rreth gjendjes së saj shëndetësore, duke iu treguar të gjithëve që vuan nga psoriaza.
Ishte viti 2016-të kur 38-vjeçarja pranoi publikisht se vuan nga sëmundja e lëkurës në fjalë, duke deklaruar se nuk ka pse ta fshehë pasi është pjesë e qenies së saj.
Vetëm një muaj më parë, Kim publikoi disa foto ku zbuloi për fansat se po trajtonte pjesë të caktuara të fytyrës së saj me vaj bimor, pasi gjendja ishte përkeqësuar tej mase.
Për ata që nuk janë të informuar rreth sëmundjes, ajo shfaqet me disa njolla të kuqe, të mbuluara me një shtresë të bardhë. Nuk ka një kurë të caktuar, megjithatë mund të mbahet nën kontroll me trajtime të ndryshme.
Mirëpo Kim, pavarësisht perfeksionizmit që e karakterizon, vazhdimisht i tregon botës se ajo është një njeri si gjithë të tjerët dhe po ashtu si shumica e njerëzve po përballet me një sëmundje e cila për hir të së vërtetës është mjaft delikate.
Së fundmi, bukuroshja ka publikuar një video në Insta Story, teksa po udhëton në makinë dhe qartazi vihen re njollat e kuqe në fytyrën e saj.
“Fytyrë me psoriazë”, mbishkruan Kim, e cila shfaqet totalisht pa make-up.
Rrallë persona do e publikonin videon e mësipërme, pasi në shumicën e rasteve dominohen nga komplekset.