Një tjetër episod i shëmtuar ka njollosur futbollin spanjoll, këtë herë në sfidën mes Atlético Madrid dhe FC Barcelona, e zhvilluar në stadiumin Metropolitano. Ndeshja, e fituar 1-2 nga katalanasit, u shoqërua me tensione jo vetëm në fushë, por edhe në tribuna.
Në qendër të vëmendjes u vu sërish talenti 18-vjeçar i Barcelonës, Lamine Yamal, i cili u bë objekt i fyerjeve ksenofobe nga një pjesë e tifozëve vendas. Incidenti ndodhi në momentin kur Yamal po përgatitej të ekzekutonte një goditje këndi, ndërsa nga tribuna u dëgjuan thirrje ofenduese dhe diskriminuese ndaj tij. Mes tyre, sipas raportimeve, u artikuluan fraza si “je shumë i shëmtuar” dhe “ik me Marokun”, të shoqëruara me ofendime të tjera.
Ky nuk është rasti i parë që futbollisti i ri përballet me sjellje të tilla. Vetëm pak kohë më parë, gjatë një ndeshjeje mes Spanjës dhe Egjiptit në Cornella, u dëgjua një kor me përmbajtje raciste dhe ksenofobe, i cili u kritikua publikisht nga vetë Yamal.
Pavarësisht përpjekjeve të vazhdueshme të autoriteteve dhe klubeve për të luftuar diskriminimin në stadiume, episode të tilla vazhdojnë të përsëriten, duke ngritur shqetësime serioze për imazhin e futbollit në Spanjë. Deri më tani, autorët e fyerjeve nuk janë identifikuar, ndërsa pritet reagimi i institucioneve përkatëse ndaj këtij rasti të ri që ka shkaktuar indinjatë në opinionin sportiv.
