- Emri i vërtetë:Tahliah Barnett
- Nga:Gloucestershire, Angli.
- Mosha:27 vjeç
- Kur u bë e njohur? Debutoi për herë të parë në vitin 2012, me “EP1”, por mori famë në 2013 me “Water Me”. Stili i saj i muzikës është një miks mes R&B alternative dhe trip-hop.
- Çfarë do të thotë “FKA Twigs”? E mori nofkën “Twigs” nga mënyra si i kërcasin kyçet kur bëhet gati për të kërcyer. Më pas i shtoi “FKA” (“Formerly Known As”) pasi një artist tjetër u ankua për përdorimin e emrit të vet.
- Para këngës? FKA Twigs thotë se gjithmonë ka qenë e fokusuar te muzika, por gjithashtu është një kërcimtare e mirë. Kjo vjen nga gene të mira, pasi të dy prindërit e saj janë balerinë. Gjithashtu deklaron se në vitin 2013 ka punuar si bariste gjatë fundjavave, për të përballuar shpenzimet e muzikës së saj.
- Këngëtarët e parë që patën impakt mbi të, ishin Billie Holiday, Ella Fitzgerald dhe Marvin Gaye. Kur filloi të kompozonte muzikë, ajo donte të riprodhonte muzikën që asaj vetë i pëlqente. Ajo nuk fokusohet vetëm në një zhanër, por i pëlqen të eksperimentojë me melodinë, ta vendosë zërin e saj në atmosfera të ndryshme. Në të njëjtën mënyrë ajo eksperimenton me pamjen, me flokët, veshjen dhe make up-in. Videoklipet e saj janë art i gjallë, që nga mënyra se si ajo duket, si lëviz e deri te sinkronizimi i audios me imazhin.
“Jam artiste, jam e çuditshme e sigurisht edhe pak ecentrike. Unë pëlqehem nga njerëzit që duan diçka ndryshe” -thotë ajo- “por bota, në përgjithësi, nuk ka dëshirë në të vërtetë të përqafojë gjëra të ndryshme. Kjo nuk ndodh gjithmonë. ”
Ajo u rrit në një zonë rurale me të ëmën dhe njerkun e saj. Twigs e njohu babain e saj biologjik kur ishte 18 vjeç. Deri në moshën 10- vjeçare, familja e saj kishte të ardhura normale, por më pas shpenzimet u rritën. “Kur je fëmijë, nuk je shumë elastik, nuk kupton. Vetëm tani, kur kthej kokën pas, më kujtohet që njerku im më dha një monedhë £5. I mbani mend monedhat £5? Ato ishin të mëdha dhe shkëlqenin. Unë i mbështillja me letra për të luajtur “Kërkim thesari”, si piratët. Ishte diçka që ia tregoja gjithë krenari shokëve kur i kisha pranë.”
“Kur isha 13 vjeç, mamaja ime më tha: “‘Tahliah, më vjen shumë keq që po ta kërkoj këtë…” Iu përgjigja: “Jo, është e imja.” Nuk e kuptoja. Ishte një dhuratë që e dashuroja. Ajo më tha: “Më duhen sepse nuk kam lekë për të blerë ushqim.” Kështu shkuam në Tesco dhe bëmë pazarin javor me monedhën £5, edhe se supozohej të mos e harxhoja kurrë. Ishte kujtim, apo jo!?”
U rrit në Gloucestershire, por u zhvendos në Londër gjatë adoleshencës së saj. Fotografi Matthew Stone e pikasi në transport publik, (me siguri e kanë tërhequr sytë e saj). I kërkoi t’i bënte një fotografi e cila përfundoi si kopertinë e revistës “i-D” .
Ishte e zgjuar dhe kjo e bëri të fitonte bursë në një shkollë private në një qytet afër me të sajin. “Jeta ime ka qenë e çuditshme. Në shtëpi nuk kishim asgjë e më pas unë ika në një shkollë private. Isha gjithmonë fëmija i varfër edhe pse u përpoqa të mos isha e tillë. Gjithmonë vishesha mirë, isha shumë aktive në shkollë, përfshihesha në të gjitha aktivitetet e shkollës. Ndoshta për të kompesuar faktin që nuk do shkoja dot për ski gjatë pushimeve të janarit. Mendoj se këto kanë ndikuar në formimin e karakterit, ndoshta edhe në të karrierës. Mëson si ta prezantosh veten, si të sillesh në rrethana të caktuara, si ta shesësh imazhin tënd…”
Twigs flet për një brez të ri njerëzish, të artistëve, të grave, idenditeti i të cilëve vepron ndryshe. Flet për një moshë, ku zhanret muzikore janë përzier më së miri. Twigs flet për ata, gënjeshtrat e të cilëve janë po aq të rëndësishme sa të vërtetat e tyre, sidomos ata të cilët mund t’i ndërthurin të dyja për të krijuar art.
Është një nga ato artiste si St Vincent, Lykke Li, Björk, pse jo, si Prince që e mjergullonin veten dhe muzikën e tyre me një lloj misteri. Kërkon të zbërthesh çdo gjë, sepse ka të dhëna, por ka pak të thëna..
