Elvana Gjata nuk është më në kërkim policor. Sipas “Ballkanweb”, ka përfunduar afati prej 30 ditësh, kur këngëtarja shqiptare ishte në kërkim nga policia për të dhënë deklaratën e saj në lidhje me masakrën e ish-Bllokut, ku mbeti i vrarë një 28-vjeçar dhe u plagosën dy persona.
Ngjarja e rëndë ndodhi me katër tetor, ndërsa Elvana Gjata u shpall në kërkim pesë ditë më pas, për të dhënë versionin e saj në lidhje me ngjarjen, pasi ishte në lokal vetëm 20 minuta përpara krimit. Shpallja në kërkim policor e detyronte Gjatën që të paraqitej për të dhënë shpjegime brenda 30 ditëve, pasi duhej të jepte deklarimet e saj për ngjarjen. Por kjo gjë nuk ka ndodhur, sqaron “Ballkanweb”.
Këngëtarja shqiptare u largua nga Shqipëri me datë 5 tetor, vetëm disa orë pasi ndodhi masakra në ish-Bllok drejt një vendi të Bashkimit Europian. Ndërkohë që në kërkim janë shpallur edhe i dashuri i saj, Ervin Mata si dhe komando Meviol Bilo, i cili dyshohet se ka qëlluar ndaj viktimës dhe dy të plagosurve.
Vetëm pak ditë më pare, Elvana Gjata u bë e “gjallë” në rrjetet sociale, duke ndjekur në “Instagram” disa nga figurat e njohura politike në vend.
