Ajo do të jetë pjesë e muzikalit më të famshëm të momentit “Notre Dame de Paris” dhe pikërisht në rolin e Esmeraldës në kastin e dytë të tij.
Lajmi i rëndësishëm për këngëtaren Elhaida Dani u mësua pak ditë më parë, ndërsa për përkushtimin e saj mund ta marrim me mend.
Edhe pse Elhaida e sheh këtë eksperiencë si një trampolinë për arritjen e majave të karrierës së saj, ajo i është përkushtuar këtij roli “me mish e me shpirt”. Ajo tregon se ka kaluar dhjetëra audicione dhe gjatë provave ka humbur rreth 10 kilogramë nga puna e rëndë dhe lodhja, por e gjitha kjo duket se ia vlejti.
Gjatë një interviste për programin e mëngjesit “Wake Up”, Elhaida u shpreh se ideja për t’u bërë pjesë e një muzikali erdhi që në momentin që u shpall fituese e “The Voice Of Italy”. Në një bisedë me ish-trajnerin e saj Cocciante, ajo u sugjerua të konkurronte për këtë rol të shfaqjes madhështore të Viktor Hygos.
