Një ngjarje e rëndë kriminale është regjistruar mesditën e sotme në kryeqytet, ku një person ka humbur jetën si pasojë e plagosjes me armë të ftohtë. Ngjarja ka ndodhur në rrugën “Kongresi i Lushnjës” në Tiranë, pas një konflikti të dhunshëm mes dy grupeve të të rinjve.
Sipas informacioneve paraprake, konflikti ka nisur fillimisht brenda një lokali, për motive që dyshohet se kanë qenë banale. Situata ka degraduar më pas, duke përfunduar në një përleshje fizike, ku është përdorur thika. Si pasojë, njëri prej të përfshirëve ka mbetur i plagosur rëndë.
I plagosuri është transportuar me urgjencë për ndihmë mjekësore, por fatkeqësisht nuk ka mundur t’u mbijetojë plagëve të marra dhe ka ndërruar jetë. Viktima është identifikuar si Egli Pashollari, 31 vjeç.
Egli Pashollari, ish-gardian burgu i akuzuar më parë se tentoi t’i fuste akool në qeli Emiljano Shullazit, humbi jetën pas konfliktit në rrugën “Kongresi i Lushnjes”.
Menjëherë pas ngjarjes, forca të shumta policie kanë mbërritur në vendngjarje, duke rrethuar zonën dhe nisur hetimet për zbardhjen e plotë të rrethanave. Policia po punon për identifikimin dhe kapjen e personave të përfshirë në konflikt, si dhe për sqarimin e roleve të secilit prej tyre.
Grupi hetimor ka marrë në pyetje dëshmitarë okularë dhe po analizon pamjet e kamerave të sigurisë në zonë, të cilat pritet të ndihmojnë në dokumentimin e ngjarjes. Autoritetet kanë bërë me dije se hetimet vijojnë intensivisht, ndërsa priten detaje të tjera zyrtare lidhur me këtë ngjarje të rëndë që ka tronditur kryeqytetin.
