Një ngjarje e rëndë është regjistruar në Prishtinë. Një 41-vjeçare ka humbur jetën pas dhunës që bashkëshorti ka ushtruar ndaj saj.
41-vjeçarja M.Zh., nga Gushterica e Poshtme e komunës së Graçanicës,nderroi jetë sot në Qendrën Spitalore Klinike në Prishtinë, pasi burri i saj e kishte rrahur brutalisht duke i shkaktuar lëndime të rënda.
Lajmi u bë me dije edhe nga drejtori i Qendrës Emergjente në Prishtinë, Naser Syla, i cili thotë se gruaja kishte hemorragji në tru për shkak të dëmtimeve që kishte pësuar si pasojë e dhunës.
“Fatkeqësisht, ajo ka ndërruar jetë mëngjesin e sotëm. Ajo kishte një hemorragji në tru nga lëndimet e rënda, dhe ne nuk mundëm ta operonim në atë gjendje. Ajo ishte në makineri 24 orë”, tha Syla.
41-vjeçarja përfundoi në spital në gjendje të rëndë shëndetësore mbrëmjen e 31 korrikut. Bashkëshorti i saj, D.Zh., është arrestuar dhe po mbahet në paraburgim.
