Një tjetër ngjarje e rëndë është regjistruar pasditen e sotme në qytetin e Shkodrës. Në lumin Drin, në afërsi te urës së Bahcallekut, është gjetur trupi i pajetë i një shtetasi rreth 40 vjeç, i cili nuk është identifikuar ende.
Policia ka përshkruar me detaje viktimën, sakaq nga këqyrja paraprake e trupit nuk janë konstatuar shenja dhune. Policia po punon për identifikimin e viktimës dhe zbulimin e shkaqeve të vdekjes së tij.
Njoftimi i Policisë
Në lumin Drin, në afërsi te urës së Bahcallekut, është gjetur trupi i pajetë i një shtetasi rreth 40 vjeç, ende i paidentifikuar, i gjatë rreth 175 cm, i veshur me triko pambuku me mëngë të gjata ngjyrë gri, pantallona të gjata ngjyrë kafe, atlete të zeza Adidas, me flokë të shkurtër dhe pa mjekër.
Nga këqyrja paraprake e trupit nuk janë konstatatuar shenja dhune.
Grupi hetimor nën drejtimin e Prokurorisë vijon punën për identifikimin e 40 vjeçarit si dhe për sqarimin e rrethanave të rastit.
