Komuna e Ferizajt u trondit pasditen e djeshme pasi një dasmë u kthye në mort. Në oborrin e një restoranti në fshatin Bibaj të Ferizajt, Festim Ramadani, zyrtar policie, qëlloi me armë burrin e tezes 89 vjeç.
Viktima, Sadri Sadriu, u qëllua me armë zjarri jashtë oborrit të restorantit ku po festohej dasma.
Sipas raportimeve nga mediat e Kosovës, Sadriu nga Lugina e Preshevës mësohet se është xhaxhai i Prindon Sadriut, bashkëshortit të presidentes së Kosovës, Vjosa Osmani.
Pasi kreu krimin, Ramadani u dorëzua në polici.
Vrasjen dyshohet se autori e ka kryer me armën zyrtare por ende nuk dihet asnjë motiv lidhur me ngjarjen.
Lidhur me rastin detaje ka dhënë Inspektorati Policor i Kosovës. Bazuar në informacionet fillestare, IPK thotë se dyshimet janë se zyrtari policor i dyshuar në këtë rast kishte shkuar në këtë lokacion dhe kishte shtënë me armë zjarri në drejtim të viktimës, i cili si pasojë e lëndimeve të pësuara ka ndërruar jetë .
