Një ngjarje e rëndë është shënuar në Vlorë, ku një vajzë e mitur është sulmuar nga një qen pitbull, duke shkaktuar panik te familjarët dhe kalimtarët që ndodheshin pranë. Ngjarja mund të kishte marrë përmasa edhe më tragjike, por ndërhyrja e menjëhershme e një punonjësi të bashkisë shmangu pasoja më të rënda për 4-vjeçaren.
Punonjësi, i cili ndodhej rastësisht në vendin e ngjarjes, ka treguar se reagoi në sekondat e para sapo pa sulmin. Sipas tij, qeni, i cili lëvizte i lirë në qytet dhe kishte një zinxhir të lidhur në qafë, u turr papritur drejt vajzës së vogël dhe e kapi në kokë.
Ai ndërhyri menjëherë, duke iu afruar kafshës dhe duke e kapur nga zinxhiri për ta larguar nga e mitura. “Vajza ishte më nënën me gjyshen dhe gjyshin. Qeni po kalonte atje, u turr dhe i kapi kokën. Vajta e kapa qenin dhe e lidha me zinxhir. Qeni ka tre ditë rrugëve. Vajzën e kafshoi në kokë… shpëtoi, fati i saj dhe që unë ndërhyra në moment. Qeni ka gjithë ditën që vjen vërdallë me një zinxhir”, tha ai.
Pas ngjarjes, vajza është transportuar menjëherë në spitalin e Vlorës, ku po merr ndihmën e nevojshme mjekësore. Fatmirësisht, ndërhyrja në kohë bëri që ajo të shpëtojë nga dëmtime edhe më të rënda.
Ndërkohë, autoritetet po punojnë për identifikimin e pronarit të qenit, pasi ende nuk dihet se kujt i përket. Policia ka nisur hetimet për zbardhjen e plotë të rrethanave të ngjarjes, e cila mund të kishte përfunduar me pasoja fatale.
