Dy vajza të mitura kanë rrezikuar mbytjen në plazhin e Qerretit në Kavajë.
Shqiptarja.com raporton se vajzat e moshës 10 dhe 15 vjeçare kanë qenë duke u larë në det kur kanë kërkuar ndihmë pasi po mbyteshin.
Fatmirësisht i janë gjendur pranë pushuesit që ndodheshin në plazh, të cilët kanë vrapuar për t’iu ardhur në ndihmë.
Pasi u nxorën nga uji, vajzat u dërguan në spitalin e Durrësit, ku janë jashtë rreziku për jetën.
Pas ngjarjes së rëndë, forca të policisë nisën patrullimin në zonë.
Por ngjarja që për pak do të kthehej në një tragjedi, solli në vëmendje problematikën me mungesën e rojeve të plazhit.
Deri më tani janë shënuar 4 viktima nga mbytja, që prej nisjes së sezonit turistik, dhe shkak për këtë është edhe mungesa e rojeve të plazhit. 4 turistë nga Kosova kanë humbur jetën në bregdetin shqiptar në më pak se 10 ditë.
Një 73-vjeçar nga Kosova u mbyt në zonën e Shkëmbit të Kavajës, pikërisht për shkak të mungesës së rojeve bregdetare, raporton Ora News.
Thuajse në të gjithë vijën bregdetare të vendit ka kulla të ngritura, por mungojnë rojet bregdetare, ndërhyrjet e të cilëve mund të shpëtojnë jetë në plazhe.
/Shqiptarja.com
