Çdo javë në rubrikën “Pyet Psikologen” do të postohet një letër e dërguar nga lexuesit e iconstyle.al. Nëse keni ndonjë shqetësim në jetën personale, familjare apo profesionale, na shkruani dhe psikologia e redaksisë sonë do t’iu përgjigjet, duke respektuar të gjitha të drejtat tuaja të privatësisë.
Përshëndetje! Jam zënë me dy shoqe, por nuk di si të veproj. Ato kërkojnë që të sqarohemi. Më morën celularin fshehurazi dhe më pas e hapën dhe po shikonin. Kur i pyeta më thanë që nuk panë gjë, por nuk kam folur prej tre ditësh. Në fillim besoj se e kanë marrë për shkaka dhe kur e kanë parë që e kisha pa kod kanë hyrë në detaje. Dua të ballafaqim me to, por kam tipin që jam pak kokëfortë, nëse më flasin do t’u flas. Për momentin asnjëra nga ne nuk po vepron.
E kuptoj që je shqetësuar dhe tensionuar me veprimin e shoqeve te tua. Patjetër që nuk është veprim i mirë, pasi të kanë marrë diçka që është e jotja pa lejen tënde. Madje, është veprim abuziv (vetëm marrja e celularit fshehurazi). Ndërsa hyrja në të dhënat e tua personale është edhe më abuzive. Askush nuk ka të drejtë të të marrë telefonin dhe të shohë apo të lexojë ç’ka në të! Ky veprim nuk është shaka, pasi shoqet nuk mund të bëjnë shaka të tilla. Kjo ndikon direkt te humbja e besimit.
Unë e kuptoj sikletin që po përjeton dhe zemërimin që ndien ndaj tyre, por e mira është që të flasësh hapur me to. Thuaju si u ndjeve (e zhgënjyer, e lënduar, e zemëruar) dhe që nuk e prisje që ta bënin një veprim të tillë. Thuaju që për to mund të jetë shaka, ndërsa për ty jo.
Duke folur hapur, do t’i japësh vetes mundësi të shprehësh ndjenjat, të tregohesh e ndershme me to, duke iu treguar sinqerisht sesi je ndjerë (shpresoj ta kuptojnë që kanë vepruar gabim).
Nëse do ta kesh të vështirë, mund të bisedosh edhe me një të rritur tjetër, te i cili beson fort.
Uroj për një zgjidhje të shpejtë të situatës!
*Lediona Braho, psikologe klinike
Për Iconstyle.al
