Viti i ri shkollor nuk ka nisur fort mirë për nxënësit e zonës së Borakajve në Durrës. Shkolla në Borakaj “Adem Sabli” është jashtë kushteve infrastrukturore dhe për pasojë, 150 nxënësit e kësaj zone janë dërguar të ndjekin orët e mësimit në shkollën e Maminasit.
Prindërit e fëmijëve, kanë refuzuar kategorikisht të dërgojnë fëmijët në shkollë në Maminas dhe për këtë listojnë disa arsye. Fillimisht, ata shprehen se është tejet e rrezikshme të udhëtojnë aq larg, pasi vetëm në muajt e fundit kanë ndodhur rreth 2-3 aksidente në këtë zonë.
Gjithashtu, prindërit nuk janë dakort që klasat e para të bëjnë mësim në orët e pasdites, pasi duhet të përfundojnë në mbrëmje, e sipas tyre nuk është llogjike.
“Është e patolerueshme. Klasat e para nuk mund të bëjnë mësim në darkë, është jashtë logjike”. –tregoi një prind.
Nxënësit të shoqeruar nga prindërit po protestojnë para bashkisë së Shijakut për zgjidhjen e problemit.
Në shkollën “Adem Sabli” bënin mësim katër fshatra. Prej rreth një viti nxënësit janë zhvendosur në Maminas.
Burimi: Ballkanweb.al
