Moderatorja Xhemi Shehu kishte disa kohë që i kishte munguar ekranit të publikut shqiptar, për shkak të mungesës së madhe që ajo ka bërë lidhur me moderimin.
Që pas largimit nga “Portokallia”, emisionit që së fundmi prezantonte në Top Channel, moderatorja e njohur zgjodhi që të ndiqte një jetesë modeste, jo shumë të përfshirë në media dhe t’i përkushtohej plotësisht familjes.
Megjithatë, ajo u rikthye sërish së fundmi në drejtimin e një spektakli madhështor dhe kjo ndodhi pikërisht tek 3 netët e “Festivalit të 60-ë të Këngës”, ku Xhemi ishte një nga katër prezantuesit.
Duket se Xhemit iu duk një eksperiencë e veçantë e të paharrueshme, e cila, pavarësisht uljeve dhe ngritjeve, nuk do donte ta përsëriste më si eksperiencë. E pyetur në “Top Albania Radio”, ajo u shpreh:
“Si eksperiencë nuk kishte lidhje me asgjë që kam bërë gjatë gjithë jetës. Ishin tre ditë shumë intensive me ulje dhe ngritjet e veta. Ka pasur momente tensioni të cilat nuk dua t’i kujtoj. Dua të kujtoj vetëm momentet e bukura. Do ta mbaj mend gjithmonë, por nuk do e përsëris më si eksperiencë”, pranoi ajo.
Megjithatë, gjatë intervistës së dhënë, Xhemi ka tërhequr vëmendjen e të gjithëve gjatë një fraze teksa i uronte shqiptarëve Vitin e Ri.
Ajo ka uruar sa më shumë shëndet dhe shumë fat në vitin pasues për të gjithë shqiptarët, por jo vetëm, Xhemi ndau dhe dëshirën e saj që të rikthehet në Top Channel, televizion në të cilin u bë e njohur dhe kaloi një eksperiencë të gjatë profesionale të jetës së saj:
“Vetes dhe dëgjuesve i uroj vetëm shëndet sepse dy vitet e fundit na kanë bërë të kuptojmë se asgjë nuk ka rëndësi përveç shëndetit. Ndërsa për veten uroj gjithashtu të kthehem në Top Channel”, është shprehur ajo.
