Djersitin këmbën dhe mbajnë erë të keqe: Trendi i këpucëve që po të rrezikon shëndetin

J Caushi Postuar ne 21 May 2018,11:51:04

Ka pasur shumë trende ndër vite të këpucëve, që kanë qenë sa të çuditshme aq edhe të parehatshme. Por këpucët plastike? Është komplet tjetër histori, pasi nga nxehtësia krijohet një mjegull, djersë dhe erë e keqe.

Në fakt, këpucët plastike krijojnë avull dhe shkenca tani na tregon nëse duhet të blini apo jo, një palë të tilla.

Këpucët plastike janë kthyer si një shaka edhe në “Instagram”. Një foto e çizmeve “Yeezy Tubular”, që kushtojnë 950 dollarë, na krijojnë një ndjesi të pakëndshme. Duket që këmbët e modeles janë në hall të madh, ndërsa brenda çizmeve është krijuar avull. Në mbishkrimin e fotos shkruhet:

“Kur jashtëqitja nuk mban erë të keqe, por këmbët e tua po”.

Nga ana tjetër disa nga emrat më të njohur në botë, si Kim Kardashian, Bella Hadid, Rihanna apo Kristen Stewart, kanë treguar se këto janë këpucët e tyre të preferuara.

Profesionistët e shëndetësisë thonë se rreziqet e këpucëve plastike nuk janë për t’u nënvlerësuar. Sipas Dr. Rock Positano, mungesa e qarkullimit të ajrit në këmbë sigurisht që është një faktor i dëmshëm.

“Këmba në vetvete [pa çorape] në një këpucë, plastike apo jo, siguron një mjedis të përsosur për rritjen e baktereve. Është e lagësht dhe e nxehtë. Kombinimi i këtyre gjërave bën që këmba brenda një këpuce të jetë një vend i rrezikshëm. Duke mos përfshirë faktin se disa njerëz janë alergjik nga plastika”, thotë Positano.

Një tjetër disavantazh i këpucëve plastike është se janë shumë të ngurta.

“Me një këpucë plastike, nuk keni fleksibilitet. Këmbët fryhen pasdite, kështu që këmba juaj mund të rritet edhe me një numër dhe këpucët plastike nuk zgjerohen me këmbën. Një këpucë lëkure ka aftësi për t’u zgjeruar”, shpjegon mjeku.

Ai thotë që nëse i vishni në situata të papërshtatshme, mund të ndikojnë në disa pjesë të trupit, si të kyçeve.

Nëse ende dëshironi të blini këpucë të tilla, mendojeni në këtë mënyrë: Këto këpucë janë fantastike për foto ose për ndonjë koktej, por jo për të kërcyer. Ose të paktën zgjidhni t’i vishni me çorape!