Ajo mbushi dje 70 vjeçe, por vite të jetuara në më të mirat e tyre! Cher ka shumë për të kremtuar, pasi si një artiste e rrallë mbajti karrierën e saj pas pesë dekadash. Por jo vetëm kaq, këngëtarja ikonë provoi edhe kinematografinë, ndërsa arriti të mbyllte 26 albume dhe u vlerësua një sërë çmimesh, përfshirë këtu një “Oscar” e një “Grammy”.
Vajza nga Kalifornia e preku famën për herë të parë si pjesë e duo-s muzikore “Sonny & Cher”, më së shumti për hitin e vitit 1965 “I Got You Babe.” Me zërin e saj të thellë që arrin edhe regjistrat më të ulët, shumë shpejt do të provonte karrierën si soliste e nuk do t’i ndahej më skenës për 50 vjet, duke u kthyer në një emër të njohur në mbarë botën.
Cher konsiderohet një nga të paktat artiste që arriti të menaxhonte më së miri dhe tranzicionin nga kënga tek kinematografia, duke çuar në shtëpi edhe një çmim të “Academy Award” për performancën e jashtëzakonshme të vitit 1988 në krah të Nicolas Cage me filmin “Moonstruck”.
Pavarësisht një legjioni masiv adhuruesish që përfshin mbi 1,7 milionë ndjekës në “Twitter” dhe plot të tjerë në “Facebook”, këngëtarja sërish shprehet e befasuar nga interesi i vazhdueshëm ndaj punës së saj.
Ndërkohë këngëtarja ka qenë gjithmonë një ikonë mode, duke guxuar me truporet, ekspozimin e trupit dhe modelet e çuditshme të flokëve, të cilat janë ende frymëzim për industrinë dhe celebrities.
Burimi: Daily Mail
