Ish-kongresmeni amerikan DioGuardi, vazhdon fuqishëm luftën për të shpëtuar Butrintin, që po e shkatërron qeveria shqiptare
DioGuardi, me origjinë arbëreshe, drejtues i organizatës “Truth in Government” dhe Lidhjes Qytetare Shqiptaro-Amerikane, ka qenë gjithmonë zëri i parë kur flitet për interesat kombëtare të shqiptarëve
Ai është deklaruar totalisht kundër veprimeve të AADF për të marrë përsipër menaxhimin e Butrintit, pasi nuk përfaqësojnë as objektivat e politikës së jashtme të qeverisë së SHBA dhe as qëllim legjislativ të Kongresit të SHBA
Sipas tij, Shqipëria i ka të gjitha kapacitetet që të bëjë vetë menaxhimin e Parkut të Butrintit dhe nuk është absolutisht aspak i nevojshëm një partneritet me privatin
Joseph DioGuardi i ka dërguar një letër Ndihmës Sekretares së Shtetit, Michelle J. Sison ku i kërkon ta adresojë shqetësimin pranë USAID, që të urdhërojë Bordin e Drejtorëve të AADF-së të ndalojë menjëherë nga përpjekjet për të marrë zotërimin e Butrintit
“Të gjithë ne mund të imagjinojmë se si do të ndiheshim në SHBA nëse një fondacion i huaj do të ofronte ndërtimin e një qendre vizitorësh në Parkun Kombëtar Yellowstone, në këmbim të marrjes zotërim të plotë të këtij thesari kombëtar të SHBA-së.” Joseph DioGuardi
Ish-kongresmeni amerikan, gjithmonë mbështetës i shqiptarëve, i ka dërguar më herët një letër edhe Dr. Lazare Eloundou Assomo, drejtor i Qendrës së Trashëgimisë Botërore UNESCO për mënyrën e re të menaxhimit të Butrintit
Në letrën e tij bëhet thirrje për ta shpëtuar Butrintin, pasi sipas tij është shkelur Konventa e Trashëgimisë Botërore e vitit 1972
Teksa personazheve të huaj, organizatave për mbrojtjen e mjedisit dhe vetë qytetarëve u duket absurd vendimi për të vënë dorë mbi Zonën e Mbrojtur, qeveria jonë mbyll sytë dhe veshët, për të vazhduar me shkeljet e pazaret e saj të pista, duke i shkatërruar shqiptarëve historinë!
