Borë në Pranverë. Veriu i Shqipërisë është pushtuar nga reshje të dendura dëbore. Këto pamje vijnë nga Puka, ndërkohë më problematike janë zonat malore, ku temperaturat shkojnë deri në 0 gradë celcius. Rruga Bogë-Theth gjithashtu është zbardhur nga reshjet e borës, që pritet të vazhdojnë edhe gjatë ditës.
Borëpastruesja dhe punonjësit kanë nisur nga puna, për të mbajtur rrugën e kalueshme nga mjetet. Megjithatë këshillohet që qarkullimi drejt kësaj pike turistike kryhet me goma dimërore.
Sot, priten reshje mesatare në qarqet Shkodër, Kukës, Dibër, Lezhë, Durrës, Tiranë, Elbasan dhe Vlorë, ndërsa në qarqet e tjerë priten reshje të dobëta deri lokalisht mesatare. Në shumicën e qarqeve, këto reshje do të shoqërohen edhe me shtrëngata. Në zonën veriore dhe verilindore priten reshje të dobëta dëbore në lartësinë mbi 600 m mbi nivelin e detit.
Sa i përket temperaturave, në bregdet pritet të variojnë 10 / 15°C; në vendet e ulëta: 8 / 14 °C; ndërsa në vendet malore: 3 / 8 °C. Ndërsa era pritet të fryjë e lehtë deri mesatare. Përgjatë vijës bregdetare e lugina në orët e paradites era bëhet e vrullshme dhe fiton shpejtësi 10-16 m/sek, shoqëruar me valëzim në dete të forcës 2-3 ballë.
