Procesi gjyqësor për vrasjen tragjike të 14-vjeçarit Martin Cani vijon, ndërkohë që në seancën e fundit janë dëshmuar pesë të mitur, të cilët kanë njohuri për ngjarjen. Seanca u zhvillua me dyer të mbyllura për të ruajtur privatësinë e të miturve dhe për të siguruar procesin.
Një prej dëshmitarëve ka qenë i mituri K.B., i cili ka qenë i pranishëm në vendngjarje dhe për të cilin ka pasur pretendime nga familjarët e viktimës. Dëshmia e tij ishte shumë e rëndësishme për ndriçimin e rrethanave të ngjarjes.
Në përputhje me ligjin, dëshmitë e të miturve janë marrë pa praninë e të pandehurit, Mario Përlleshaj, i cili është akuzuar për vrasjen e Martin Canit. Përlleshaj, përmes avokatit të tij, ka mohuar akuzat, duke deklaruar se ai kishte qëlluar vetëm në drejtim të Luis Meçes, i cili mbeti i plagosur.
Në seancën e ardhshme, pritet të dëshmojnë edhe shtatë persona të tjerë, mes të cilëve katër të mitur që do të ofrojnë më shumë informacion për ngjarjen.
Procesi vijon dhe do të ketë zhvillime të tjera në javët në vijim.
