At Nikolla Xhufka, prifti kontravers i Elbasanit, ishte protagonist i një kamere të fshehtë në një emision televiziv, ku u publikuan bisedat e tij me kontekst erotik me një mashkull. Një person nga stafi i emisionit “Piranja” i shkruante Xhufkës duke i kërkuar marrëdhënie intime, ndërkohë që ky i fundit shprehte tundimin e tij.
Pas bisedave me kontekst erotik të publikura, prifti Nikolla Xhufka reagoi lidhur me ngjarjen.
Ai e ka cilësuar ‘montazh’, kamerën e fshehtë ndaj tij, teksa pretendon se është vënë në qendër të sulmeve dhe kurtheve nga Kishat serbe, greke dhe ruse, për shkak se sipas tij, ka guxuar të denoncojë uzurpimin e Kishës shqiptare nga Greqia dhe të Kishave të Kosovës nga Serbia. Për të treguar se në videon ku shfaqej ai është montazh, At Nikolla Xhufka pretendoi se dikush nëpërmjet Inteligjencës Artificiale, kishte krijuar një video ku tregonte në momente intime Janullatos dhe gazetarin Çim Peka.
Në një intervistë të zhvilluar ditën e sotme për emisionin “People” Xhufka mohoi se është homoseksual dhe u shpreh se i gjithi është një sulm me qëllim që të marrin kishat e Elbasanit dhe të mos lejojnë që në to të këndohet shqip.
Ndërsa në një intervistë për MCN, është shprehur se pas kësaj qëndron Behxhet Pacolli.
Ai deklaroi më tej se Kikën (personi që e provokoi seksualisht) ia kishte dërguar biznesmeni Behxhet Pacolli me arsyetimin se do të investojë në Kishën Ortodokse të Elbasanit.
“Në rradhë të parë do bëj një padi për emisionin që nga Piranja doli cironkë. Po të shikoni me vëmendje emisionin, një bisedë nuk ka lidhje me tjetrën.
Personi që ka ardhur tek unë quhet Kika, Kreshnik Husaj. Ai ka ardhur tek kisha në emër të biznesmenit Behxhet Pacolli dhe ka thënë që ai e ka dërguar të bëjë investim në Kishën Ortodokse të Elbasanit. Unë u ndjeva shume krenar.
Kam kamerat e kishës me zë dhe figurë”, tha At Nikolla në emisionin “Zgjohu” në MCN.
Kujtojmë se Kreshnik Husaj, i njohur ndryshe si Kika, u bë i famshëm në vendin tonë nga “Big Brother Albania 8″.
