Kur doli së fundmi fushata e Calvin Klein e quajtur #MyCalvins, të gjithë nisën të flisnin për të. Pjesë e fushatës së markës u bënë shumë personazhe të njohur të rinj, por protagonistët kryesorë ishin Kendall Jenner dhe Justin Bieber. Por sloganet e përdorura në fotografitë e veshjeve ishin ato që hapën debat së fundmi.
Pas vendosjes së një billboard-i në Nju-Jork nisën edhe reagimet për sloganet e përdorura dhe lidhja mes tyre. Heidi Zak, drejtoresha ekzekutive dhe bashkëthemeluesja e “Third Love” iu drejtua me një letër Calvin Klein pikërisht për posterin, ku ndodheshin pranë njëri-tjetrit fotografitë e aktores Klara Kristin me shprehjen “Unë joshë me #mycalvins” dhe ajo e reperit Fetty Ëap me shprehjen “Unë bëj para me #mycalvins”.
Zak shkruan se kombinimi i dy sloganeve është ofenduese, sepse është propagandë e “stereotipit të vjetruar të gjinive: meshkujt shkojnë në punë dhe bëjnë para, ndërsa femrat nuk janë asgjë se sa objekte seksi”.
“Calvin Klein për shkak të kësaj pakujdesie, duke i vendosur këto postera afër njëri- tjetrit, ka përçuar një mesazh të gabuar për femrat. Për këtë arsye mendoj se është e nevojshme që këto dy imazhe të hiqen dhe të vendosen të ndarë nga njëri- tjetri. Kompania mund të kishte zgjedhur plot imazhe të tjera për t’i vendosur aty, të cilat nuk diskriminojnë në një farë mënyre figurën e femrës”, shprehet Zak.
Menaxheri i Calvin Klein ka reaguar menjëherë, duke e zhvendosur posterin dhe duke i ndarë imazhet nga njëri-tjetri . Ai ka treguar se firma globale Calvin Klein, i merr gjithmonë në konsideratë kërkesat e klientëve dhe pomovon barazinë gjinore, duke shtuar se një gabim i tillë nuk do të përsëritet.
Burimi: Nylon
