Studion e emisionit “Opinion” , studentët e kanë përdorur mbrëmjen e sotme për të ngritur zërin në lidhje me shpenzimet e pajustifikuara të kryera nga bordet e Universiteteve. Ata sqaruan se Universiteti i Elbasanit ka kryer një shpenzim prej 280 milionë lekësh për të ruajtur godinën. Sakaq, i njëjti bord i ka dhënë vetes një shpërblim prej 35 mijë lekësh të reja për një orë mbledhje.
Duke iu drejtuar Ministrit të Financave Arben Ahmetaj, moderatori i “Opinion” Blendi Fevziu rrëmbeu megafonin dhe bërtiti me zë të lartë këto problematika për të kërkuar vëmendjen e tij.
Sakaq, studentët paralajmëruan se gjatë protestës së nesërme nuk do të kenë asnjë negociatë me qeverinë dhe kërkojnë plotësimin e kërkesave.
“Nesër që nga ora 7 deri në orën 10 në mëngjes do të mbyllen dyert e Fakulteteve! Fillon marshimi nga shkolla drejt Ministrisë së Arsimit, do të jenë edhe gjimnazistët edhe nga rrethet. Ne kemi kërkuar mbështetje tek të gjithë për protestat. Nëse nuk ka plotësim të kushteve, do të ketë përshkallëzim të protestës” – u shpreh njëri prej tyre në studio.
