Ditën e sotme po zhvillohen protesta në Tiranë dhe në Fier për vrasjen e 23 –vjeçares, Sabrina Bengaj nga ish-bashkëshorti i saj Elton Metaj. Me pankarta në duar disa qytetarë kërkojnë të vihet drejtësi për vrasjen dhe të merren masa për gratë që janë të dhunuara. Po ashtu ata kërkojnë drejtësi për të gjitha gratë që janë vrarë nga bashkëshortët.
Në Tiranë protesta ka nisur në orën 18:00 te Ministria e Brendshme, pranë zonës së pedonales. Disa nga mesazhet në pankartat e protestuesve janë: “Përgjegjësi për vrasjen e Sabrinës”, “Ngremë zërin dhe kërkojmë përgjegjësinë për çdo viktimë”, “Vrasja e grave është pandemi. Ku janë vaksinat?”, “Bëhu burrë, divorcohu!”
“Platforma kombëtare për gratë” kërkon drejtësi për nënën e ndjerë 23-vjeçare e cila u vra nga ish-bashkëshorti Elton Metaj dhe la pas një fëmijë të vogël 3 vjeç.
Ata kanë kërkuar heqjen e kujdestarisë prindërore për vrasësit e nënave.
“Duam drejtësi, mbështetje familjeve të viktimave”- thonë protestuesit.
Krimi i rëndë mbrëmjen e së premtes në Fier ishte paralajmëruar. Elton Metaj shkoi me kallashnikov pranë banesës së ish-gruas së tij 23-vjeçare, Sabrinës, duke e qëlluar pas shpine teksa ajo ishte duke ngrënë,
Gjykata e Fierit ka lënë në burg 31-vjeçarin Elton Metaj, i cili në seance u shfaq i rënduar psikologjikisht dhe pranoi krimin e rëndë.
