Bebe Rexha nuk është më pjesë e Warner Records, shtëpisë diskografike me të cilën ka bashkëpunuar për mbi një dekadë. Largimi i këngëtares shqiptaro-amerikane vjen pas një periudhe tensioni dhe mosmarrëveshjesh të përsëritura mes saj dhe kompanisë, shkruan The Sun.
Rexha, e cila arriti sukses të madh me hitin e vitit 2022 “I’m Good (Blue)” në bashkëpunim me David Guetta, ka qenë pjesë e Warner që nga viti 2013 dhe ka publikuar tre albume me këtë shtëpi diskografike. Sidoqoftë, raportet mes palëve janë përkeqësuar vitet e fundit.
Burime nga industria muzikore kanë zbuluar se largimi është parë si një mundësi pozitive nga vetë Bebe Rexha. Ajo ishte shumë e zhgënjyer me drejtimin e karrierës së saj dhe, kur gjërat arritën në një pikë kritike, Warner sugjeroi ndërprerjen e bashkëpunimit. Rexha ka pranuar këtë vendim dhe ka shprehur dëshirën për të nisur një kapitull të ri në karrierën e saj, duke ndier se kjo nuk mund të realizohej brenda Warner Records.
Pas largimit, Bebe Rexha ka punësuar një ekip të ri menaxhimi për të udhëhequr fazën tjetër të karrierës së saj, ndërsa emri i saj është hequr nga faqja zyrtare e Warner dhe kompania nuk e ndjek më në Instagram, një veprim që këngëtarja e ka kthyer mbrapsht.
Gjatë karrierës së saj, Rexha ka pasur shumë sukses, përfshirë këngën “Meant To Be” me Florida Georgia Line, e cila ka shitur mbi dhjetë milionë kopje në SHBA dhe ka mbajtur rekord për këngën më të transmetuar të zhanrit ‘country’ në Spotify. Megjithatë, projektet e saj të fundit nuk kanë arritur të përsërisin të njëjtin sukses.
Në verën e kaluar, Bebe Rexha shprehu pakënaqësinë e saj në platformën X (ish-Twitter), ku tha: “Mund të shkatërroj një pjesë të madhe të kësaj industrie. Jam e zhgënjyer. Më kanë nënvlerësuar.” Pas këtij largimi nga Warner Records, ajo duket gati për të rikthyer fuqinë dhe ndikimin e saj në industrinë muzikore.
