Arsida Çerpja, ish-banorja e “Big Brother VIP 4”, ishte e ftuar në emisionin “Live From Tirana” në Top Albania Radio, ku ka folur për përvojën e saj pas daljes nga shtëpia e “Big Brother”. Ajo bëri bujë kur vendosi të ngrinte një kallëzim ndaj G-Banit, akuzuar për ofendim dhe shpifje ndaj saj. Kjo ngjarje pati jehonë, duke tërhequr vëmendjen e publikut.
Megjithatë, pas përballjes me G-Banin në “prime”-in e së shtunës, Arsida ka vendosur të tërhiqte padinë e ngritur ndaj tij. Ky veprim ka ardhur pas një përballjeje direkte dhe mund të ketë reflektuar ndryshimin në qëndrimin e saj ndaj situatës. Arsida nuk ka dhënë detaje të tjera mbi arsyet e tërheqjes së padisë, por ky ndryshim ka shtuar interesin dhe spekulimet lidhur me dinamikën mes dy ish-banorëve.
Si erdhi vendimi për të ngritur një padi ndaj G-Banit?
Isha duke pritur një falje nga G-Bani. Po më peshonte si fjalë dhe dukej sikur nuk e kisha mbyllur akoma “Big Brotherin” tim. Jam person që i mendoj shumë gjërat dhe pastaj u konsultova me avokatin dhe më tha se kjo gjë qëndronte. Unë nuk u intimidova, nuk u fsheha dhe e çova deri në fund.
Cilat do të ishin pasojat e kësaj padie?
Do të kishte pasoja fiskale, një shumë qesharake, 500 mijë lekë deri në 2 milionë e gjysmë që do të më jepte mua. Mua ajo që më shqetësoi është kultura e mosndëshkimit. Nëse thua një fjalë të keqe ka pasoja, nëse bullizon, ka pasoja, prandaj stop. E përdora imazhin tim për këtë kauzë. Doja t’i shkoja deri në fund.
A mendon se G-Bani nuk duhej ta vazhdonte rrugëtimin e tij në BBV?
Nuk duhet ta vazhdonte lojën. Ka ca limite që duhet t’i respektosh. Nuk mund t’i shkosh me grusht tjetrit e të bësh sikur e godet.
Pse e more vendimin për ta tërhequr padinë?
Jam një Peshk idealist që besoj tek fundet e lumtura. Mënyra si u prezantua dhe si foli që ka lekët e fundit, sado e fortë të jesh të vjen keq. Doja t’i besoja Arbrit.
A mendon se mund të kesh një raport miqësor me G-Banin jashtë?
Jam shumë diplomatike si natyrë, por nuk është në tipologjinë e meshkujve që kam shoqëri. Mundohem të shmang çdo lloj debati.
Si e komenton zgjedhjen e Eglit për të çuar në nominim veten dhe Xumin? Kush mendon se del?
Më erdhi shumë keq. M’u duk shumë adoleshentesk. Kutia e Pandorës është dhurata më e madhe që mund të të bëhet aty brenda. Ta harxhosh për Xumin, kur mund të vendosësh dy lojtarë të tjerë… Realisht nuk është kaq i bezdisshëm dhe ti e nxjerr në nominim… Do ishte fantastike nëse do nxirrnin Eglin. Nga ana e lojës do ishte fantastike, por është e pamundur. Kështu që Xumi del. Egli është faktor aty brenda.
