Ministria për Evropën dhe Punët e Jashtme ka udhëzuar të gjithë qytetarët që kanë planifikuar udhëtime, t’i anulojnë ato, nëse s’janë domosdoshmërisht të nevojshme për ta apo familjarët e tyre.
Në një njoftim të fundit për personat që u ka përfunduar afati i qëndrimit në Itali, ministria bën me dije se duke nisur nga data 2 mars 2020, është vendosur një pezullim 30 ditor i afateve për procedimet administrative lidhur me qëndrimin e këtyre shtetasve të huaj në territorin italian.
Një pjesë e konsiderueshme e kompanive të fluturimit i kanë anuluar fluturimet për në aeroportin e Rinasit.
Për më tepër, MPEJ njofton se një numër i konsiderueshëm shtetesh kanë ndaluar kalimin tranzit përmes aeroporteve të tyre, si dhe qarkullimin e të huajve në territorin e tyre.
Sa i përket shërbimeve konsullore të nevojshme apo të emergjencës për të cilat qytetarët dëshirojnë të aplikojnë, MEPJ informon se qytetarët duhet të drejtohen në platformën e shërbimeve konsullore online, në faqen e Ministrisë për Evropën dhe Punët e Jashtme.
“Për çdo informacion tjetër të nevojshëm, MEPJ i bën thirrje të gjithë qytetarëve shqiptarë, jashtë territorit të Republikës së Shqipërisë, të kontaktojnë pa hezitim me Përfaqësitë e RSH-së në vendin ku ndodhen, në numrat e tyre të emergjencës”.
Pak më parë, në një lidhje telefonike me “News24” kreu i Partisë Agrare Ambientaliste, Agron Duka njoftoi se së bashku me 270 pasagjerë është bllokuar në Gjermani, pasi kompania e udhëtimit pezulloi fluturimin.
Duka deklaroi se kishte shkuar në Gjermani për një punë, por krejt parapritur dhe pa njoftuar, kompania kishte vendosur të anulonte udhëtimin për në orën 7:25 të mëngjesit.
