Kreu i Lëvizjes Vetëvendosje, Albin Kurti, ka dhënë dorëheqje nga posti i kryeministrit të Kosovës, për t’i hapur rrugë marrjes së mandatit të ri si deputet i legjislaturës së nëntë. Në të njëjtën linjë kanë vepruar edhe anëtarët e tjerë të Qeverisë në detyrë, të cilët kanë fituar ulëse në Kuvend pas zgjedhjeve të 9 shkurtit.
Megjithatë, procesi i konstituimit të Kuvendit nuk ka rrjedhur sipas pritshmërive. Raporti i komisionit të përkohshëm për verifikimin e mandateve të deputetëve nuk është miratuar, çka ka sjellë ndërprerjen e seancës konstituive – një zhvillim i paprecedentë në historinë parlamentare të vendit.
Situata është tensionuar në sallë, me disa deputetë që janë larguar, ndërsa anëtarët e komisionit po zhvillojnë konsultime me kryesuesin e seancës për të vendosur hapat e mëtejshëm. E ardhmja e kësaj legjislature mbetet e paqartë për momentin, ndërsa pritet një zgjidhje për të kaluar ngërçin procedurial.
