Josh Radnor, aktori i njohur për rolin e arkitektit Ted Mosby në serialin shumë të dashur How I Met Your Mother, ka ndarë një lajm të bukur me fansat e tij: ai është bërë baba për herë të parë. Aktori 51-vjeçar e zbuloi lajmin vetëm së fundmi përmes një postimi në Instagram, ku numëron mbi 1.1 milion ndjekës.
Radnor publikoi tre fotografi të ëmbla me foshnjën, të shoqëruara me një përshkrim emocional, ku tregoi se ai dhe bashkëshortja e tij, Jordana Jacobs, janë bërë prindër disa muaj më parë. “Pra, unë dhe gruaja ime u bëmë me fëmijë disa muaj më parë!”, shkroi aktori, duke ndarë edhe disa detaje të veçanta për të voglin e tyre.
Sipas Radnor, buzëqeshja e foshnjës “ndriçon dhomën”, ndërsa ai e përshkruan si shumë vëzhgues dhe të menduar. Ai shton se i vogli hipnotizohet sa herë që aktori i luan këngë në kitarë dhe qesh pa masë me fjalën “baba ghanoush”. “Ai është një kënaqësi e vërtetë dhe unë dhe Jordana jemi shumë të lumtur që është këtu”, shkroi Radnor.
Lajmi për lindjen e fëmijës vjen dy vjet pas martesës së çiftit, të cilët kanë zgjedhur ta mbajnë jetën private larg vëmendjes së madhe mediatike. Megjithatë, ky moment i veçantë i ka shtyrë ata të ndajnë lumturinë me publikun.
Josh Radnor mbetet një nga aktorët më të dashur për audiencën televizive, veçanërisht falë rolit të Ted Mosby-t, personazhit që e bëri të njohur në mbarë botën dhe që vazhdon të kujtohet me nostalgji nga fansat e serialit.
