Pavarësisht kushteve të vështira financiare, në Korçë u mbajt Ceremoniali zyrtar i mirëseardhjes së Këshillit të Ministrave të Kosovës. Kushtet e vështira të motit mund të jenë bërë shkak edhe për aksidentin e dy automjeteve të eskortës së kryeministrit Rama në hyrje të qytetit të Korçës.
Aksidenti ndodhi rreth orës 13:30 të së hënës për arsye ende të paqarta. Nga pamjet e publikuara duket se përveç një automjeti zyrtar tip “Mitsubishi ” dhe “Toyota” në aksident është përfshirë edhe një automjet tip “Golf”.
Bëhet e ditur se tre punonjës të Gardës, Ervin Musai, Klodian Llaka dhe Shkëlqim Pojana (shofer) kanë mbetur të lënduar si dhe dy persona të tjerë të cilët ndodheshin në automjetin “Golf”. Tre gardistët e lënduar udhëtonin me makinën “Toyota”.
Një prej tyre, Ervin Musai është në gjendje më të rëndë, pasi ka fraktura në shtyllën kurrizore. Ai është transportuar me një helikopter të Ministrisë së Shëndetësisë në drejtim të Tiranës për mjekim më të specializuar.
Shkaqet e aksidentit
Policia njofton se, “mjeti tip “Voslkswagen”, që udhëtonte në krah të kundërt me eskortën, duke mos respektuar largësinë dhe për shkak të shpejtësisë e lagështisë në rrugë, ka goditur makinën tip “Range Rover”, që udhëtonte para tij dhe uli shpejtësinë, e më pas makinën e 4-rt në radhë të eskortës, e cila ka dalë nga rruga”.
