Gjykata e Durrësit ka vendosur masën e sigurisë “arrest në burg” për Nikoll Radaçin, 57 vjeç, i akuzuar për aksidentin e rëndë ku humbën jetën dy fëmijë të mitur dhe u plagos rëndë një tjetër. Ngjarja ka tronditur opinionin publik, ndërsa i dyshuari përballet me tre akuza penale: “Shkelje të rregullave të qarkullimit rrugor me pasojë vdekjen”, “Drejtimi i mjetit në gjendje të parregullt” dhe “Largimi nga vendi i ngjarjes”.
Në sallën e gjyqit, Radaçi ka qëndruar i heshtur, me kokën ulur brenda kafazit të qelqtë dhe pa praninë e familjarëve. Ndërkohë, ai nuk ka dhënë deklarime para gjykatës.
Në dëshminë e dhënë më herët përpara Oficerit të Policisë Gjyqësore (OPGJ), 57-vjeçari ka pranuar konsumimin e alkoolit para drejtimit të automjetit.
“Përpara se të drejtoja automjetin, unë kam pirë një birrë në mëngjes”, është shprehur ai.
Ai ka pretenduar gjithashtu se ka qenë duke lëvizur me shpejtësi të ulët.
“Kam qenë me rreth 30 km/h”, ka deklaruar Radaçi kur është pyetur për shpejtësinë.
Sipas tij, aksidenti ka ndodhur pasi është detyruar të devijojë për të shmangur një automjet tjetër që i ka dalë papritur në rrugë.
“Rreth orës 14.00 kam dalë nga shtëpia bashkë me mjetin me targa AB 909 PC dhe do të shkoja të merrja një vegël pune tek një shoku im. Unë po drejtoja automjetin në korsinë e djathtë, papritur nga një rrugicë lagjeje doli një automjet, unë devijova për të shmangur këtë automjet dhe kam përfunduar sipër trotuarit të anës së majtë të rrugës. Pasi hipa mbi trotuar, jam përfshirë në aksident me disa fëmijë që ndodheshin mbi trotuar.”
Ai shton se nuk ka mundur të ndalojë automjetin dhe më pas ka kërkuar ndihmë.
“Automjeti që unë po drejtoja nuk ka arritur të ndalojë dhe kam shkuar disa metra më përpara. Unë dola nga makina dhe kam shkuar tek një dyqan aty pranë ku punonjësve të dyqanit ju kam thënë të njoftojnë policinë pasi kam bërë aksident. Unë kam qëndruar tek dyqani derisa erdhi policia dhe më mori për në komisariat.”
57-vjeçari akuzohet edhe për largim nga vendi i ngjarjes dhe drejtim automjeti në gjendje të parregullt. Ai ka shtuar se nuk mban mend detaje për automjetin tjetër dhe as për fëmijët e përfshirë në aksident.
Sipas dokumenteve, Nikoll Radaçi është me arsim 7-vjeçar dhe banon në Durrës.
Ngjarja ndodhi më 3 maj në lagjen nr.15 të qytetit, ku tre fëmijë po luanin në trotuar kur u përplasën nga automjeti. Dy prej tyre, Enea Muçaj, 12 vjeç dhe Klersi Nikolli, 10 vjeç humbën jetën, ndërsa një 8-vjeçar mbeti i plagosur rëndë.
