Një ngjarje tragjike ka tronditur mëngjesin e kësaj të hëne fshatin Mengël, në aksin rrugor Elbasan–Librazhd, ku një fëmijë vetëm 7 vjeç ka humbur jetën si pasojë e një aksidenti rrugor.
Sipas informacioneve paraprake, i mituri ishte duke shkuar drejt shkollës i shoqëruar nga nëna e tij. Në një moment, fëmija dyshohet se i ka shpëtuar nga dora nënës dhe ka tentuar të kalojë rrugën, ndërsa është përplasur nga një automjet që po lëvizte në aksin nacional.
Aksidenti ka ndodhur pranë shkollës së fshatit, e cila ndodhet shumë afër rrugës kryesore. Kalimtarë dhe banorë të zonës kanë reaguar menjëherë për t’i dhënë ndihmën e parë të miturit, por fatkeqësisht ai nuk ka mundur t’u mbijetojë plagëve të marra.
Menjëherë pas ngjarjes, në vendin e aksidentit kanë mbërritur forcat e policisë, ambulanca dhe grupi hetimor. Autoritetet kanë nisur hetimet për të sqaruar plotësisht rrethanat e aksidentit, ndërsa po verifikohet edhe shpejtësia me të cilën po lëvizte automjeti në momentin e përplasjes.
Ngjarja ka shkaktuar dhimbje dhe reagime të forta te banorët e zonës, të cilët kërkojnë më shumë masa sigurie pranë shkollave dhe rrugëve kombëtare.
Ndërkohë, policia pritet të japë detaje të tjera zyrtare pas përfundimit të veprimeve hetimore në vendngjarje.
