Nëse dikush të ka sugjeruar të shohësh serialin “Outlander”, (me siguri do të ketë qenë femër) besojini 100%!
I bazuar në librin e vitit 1991, të autores Diana Gabaldon, ky serial sjell një histori fantastike të Claire Randall, një grua moderne e shekullit të 20-të që udhëton në kohë dhe përfundon në Skocinë e vitit 1743 (shek 18).
Gjithçka që Claire donte ishte një muaj mjalti romantik me bashkëshortin e saj Frank Randall, pasi të dy kishin shërbyer në forcat britanike në Luftën e Dytë Botërore (ajo si infermiere, ai si ushtar).
Por pasi Claire vizitoi një rreth shkëmbinjsh të ngjashëm me Stonehenge, përfundoi në mes të një beteje midis britanikëve dhe luftëtarëve skocezë të Klanit MacKenzie, njëri prej të cilëve, Jamie Fraser (Sam Heughan) qëllon te jetë tmerrësisht seksi dhe i pashëm.
Asaj i duhet të përshtatet me kohën ose të vdesë, ndërsa përpiqet të kuptojë sesi të rikthehet te bashkëshorti i saj. Arma e vetme që ka, janë njohuritë historike si dhe ato mjekësore që herë do t’i hyjnë në punë dhe herë do t’i shkaktojnë telashe.
Duke qenë se ka shërbyer si infermiere në Luftën e Dytë Botërore, ajo përdor zgjuarsinë e saj për të kuruar ata në nevojë dhe fatmirësisht është e vaksinuar!
Ne po ju sjellim shkurtimisht disa arsye përse nuk duhet ta humbisni serialin “Outlander”:
Pamjet spektakolare!
Historia zhvillohet në Skocinë e shekullit 18 dhe seriali është filmuar në Skoci! Pamjet janë spektakolare dhe fakti që xhirimet janë bërë në vendin ku ndodhin ngjarjet, është një veçori i shkëlqyeshme të cilin shumë njerëz do ta pëlqejnë! Peisazhi është absolutisht i mrekullueshëm dhe nëse planifikoni të shkoni atje, ekziston një hartë aktuale që gjurmon vendet ku janë bërë xhirimet!
James Alexander Malcolm Mackenzie Fraser
Jamie Fraser është personazhi kryesor që luhet nga aktori Sam Heughan dhe performanca e tij është e jashtëzakonshme. 38-vjeçari e luan në mënyrë të përkryer rolin e këtij luftëtari të ri, kokëfortë dhe naiv. Ai është i ndershëm, ka një zemër të madhe dhe ka shumë vend në të për Claire Beauchamp Randall Fraser, e portretizuar nga aktorja Caitriona Balfe.
Të shikosh sesi përplasen prejardhja angleze e Claire dhe ajo skoceze e Jamie-t, në një kontekst të ndryshëm kohe, është shumë për të qeshur! Ka një moment kur Claire e quan Jamie-n (fucking sadist) “një sadist të ndyrë” dhe ai as që e ka idenë se çfarë i tha apo për çfarë e shau.
Dhe skenat e seksit që nuk harrohen!
Skenat famëkeqe të seksit në serialin “Outlander” janë aq sensuale dhe të nxehta saqë do t’i rishihni disa herë. Këshillë: Nëse i shihni me partnerin/partneren do të ndizni pasionin në çift!
Personazhi negativ të del në ëndërr!
Kapiteni britanik Jack Randall – i luajtur shkëlqyeshëm nga Tobias Menzies – është një njeri sadist, mizor, i pamëshirshëm dhe për fat të keq, paraardhësi i drejtpërdrejtë i bashkëshortit të Claire, të cilit i ngjan jashtëzakonisht shumë (i njëjti aktor).
Randall është një nga personazhet më të errëta në serial dhe fiksimi i tij me Jamie Fraiser, arrin kulmin te një nga episodet më të vështira për t’u parë! Edhe pse romanca e Jaime-t dhe Claire është në qendër të serialit, “Outlander” mund të jetë gjithashtu shumë brutal për disa njerëz që nuk i shohin dot skenat e përdhunimit!
Kostumografia, e mrekullueshme!
Edhe pse veshjet e viteve 1700 në Evropë lënë për të dëshiruar, kjo nuk do të thotë se nuk janë figurante dhe domethënëse. Kostumografia përmirësohet ndjeshëm kur ngjarjet zhvendosen në Francë dhe fustanet e Claire janë të hatashëm!
