A duhet t’i lyeni flokët gjatë shtatzënisë

Një nga pyetjet që mund të keni gjatë shtatzënisë është nëse duhet të lyeni flokët. Në fakt studiuesit kanë dy përgjigje të kundërta për këtë fakt.

Por Organizata mbi Informacionet e Teratologjisë (OTIS) ka dhënë një informacion më të detajuar, duke sqaruar se shumë pak prej kimikateve të bojës së flokut kalojnë në trupin tuaj.

OTIS deklaron se mund të prisni për të lyer flokët në tremujorin e dytë, kur fëmija juaj është më pak i prekshëm nga këta faktorë kimik. Gjithashtu, në vend të lyerjes së gjithë flokut një opsion tjetër që mund të përdorni janë fijet, ku boja e flokut nuk bie në kontakt me lëkurën e kokës.

Një këshillë tjetër është që gjatë procesit të lyerjes duhet të rrini në një ambient mirë të ajrosur për të shmangur thithjen e kimikateve të pranishme në bojën e flokut.

Nëse vendosni të lyeni flokët vetë përdorni dorëza për të shmangur sa më shumë kontaktin me bojën dhe mos kaloni kohën e caktuar të mbajtjes së ngjyrës në flokun tuaj. Të gjitha këto këshilla jepen për bojëra flokësh të cilësisë së mirë.