Ekspertët e shëndetit po theksojnë gjithnjë e më shumë rëndësinë që ka ushqimi në funksionimin e trurit dhe ruajtjen e kujtesës. Sipas studimeve të fundit, një stil jetese i shëndetshëm mund të ndikojë drejtpërdrejt në aftësinë për t’u përqendruar, për të mësuar më shpejt dhe për të ruajtur një mendje aktive edhe me kalimin e viteve.
Specialistët shpjegojnë se harresa nuk lidhet gjithmonë me moshën, por shpesh me mënyrën e jetesës, mungesën e aktivitetit fizik dhe konsumimin e ushqimeve të përpunuara. Në shumë raste, të moshuarit që ushqehen shëndetshëm dhe qëndrojnë aktivë fizikisht rezultojnë të kenë kujtesë më të fortë sesa të rinjtë me stil jetese sedentare.
Ndër ushqimet më të rekomanduara për trurin janë perimet me gjethe jeshile, drithërat dhe kikirikët, të cilët janë të pasur me acid folik dhe ndihmojnë qarkullimin e gjakut në tru. Po ashtu, lakra, lulelakra dhe soja përmbajnë kolinë, një element i rëndësishëm për funksionimin e neuroneve dhe proceset e të mësuarit.
Edhe frutat si kajsitë, pjeshkët dhe ftuat konsiderohen të dobishme falë përmbajtjes së lartë të beta-karotenit, që ndihmon në përmirësimin e funksioneve njohëse.
Ekspertët rekomandojnë gjithashtu konsumimin e çajrave natyralë si rozmarina, rigoni i egër, trumza dhe kopra, të njohura për efektet pozitive në përqendrim dhe fokus.
Nga ana tjetër, këshillohet shmangia e alkoolit, duhanit, ushqimeve të yndyrshme dhe konsumit të tepërt të kafesë, pasi këta faktorë mund të ndikojnë negativisht në kujtesë dhe shëndetin e trurit.
