Bota e sporteve motorike është tronditur nga lajmi i ndarjes nga jeta të Kyle Busch, një prej pilotëve më të suksesshëm dhe më të njohur në historinë e NASCAR. Amerikani ndërroi jetë në moshën 41-vjeçare pas një beteje me një sëmundje të rëndë, duke lënë pas një boshllëk të madh në automobilizëm.
Busch ishte shtruar në spital gjatë kësaj jave, ndërsa gjendja e tij shëndetësore u përkeqësua me shpejtësi. Vetëm pak ditë më parë ai vazhdonte të garonte në pistë, çka e bëri lajmin edhe më tronditës për fansat dhe komunitetin sportiv. Në një deklaratë zyrtare, NASCAR shprehu dhimbjen për humbjen e një prej figurave më të mëdha të sportit.
“Me hidhërim të thellë dhe zemërthyer njoftojmë ndarjen nga jeta të Kyle Busch, dy herë kampion i Cup Series dhe një nga pilotët më të mëdhenj dhe më konkurrues të sportit tonë”, thuhej në reagimin e organizatës.
I njohur nga fansat me nofkën “Rowdy”, Busch konsiderohej një ikonë e NASCAR-it. Ai arriti plot 234 fitore në tre seritë kombëtare të NASCAR, një rekord historik që e vendos mes emrave më të mëdhenj të automobilizmit amerikan. Gjatë karrierës së tij fitoi dy tituj të Cup Series, në vitet 2015 dhe 2019, duke ndërtuar një trashëgimi që do të mbahet mend gjatë.
Përveç suksesit në pistë, Busch ishte edhe një figurë shumë e dashur për familjen e tij. Ai lë pas bashkëshorten Samantha dhe dy fëmijët e tyre, Brexton dhe Lennix. Reagime të shumta nga pilotë, skuadra dhe fansa kanë pushtuar rrjetet sociale, ku shumë prej tyre e kanë cilësuar vdekjen e tij si një humbje të pazëvendësueshme për sportin.
