Një ngjarje e rëndë ka tronditur mbrëmjen e sotme qendrën e Shkodrës, pranë shatërvanit, ku raportohet për një plagosje të dyfishtë me thikë mes adoleshentësh. Sipas informacioneve paraprake, konflikti ka ndodhur mes disa të rinjve, të cilët dyshohet se të gjithë janë nën moshën 18 vjeç.
Gjatë përplasjes, janë përdorur thika, duke lënë të plagosur dy persona. Të dy të rinjtë e plagosur janë transportuar menjëherë në Spitalin Rajonal Shkodër, ku aktualisht ndodhen jashtë rrezikut për jetën.
Sipas njoftimit të policisë, rreth orës 19:50, për ndihmë mjekësore janë paraqitur shtetasi E. P., 19 vjeç, dhe një 17-vjeçar, të cilët ndodhen nën kujdesin e mjekëve. “Shërbimet e Policisë kanë shkuar menjëherë në vendngjarje dhe, nga veprimet e para hetimore, dyshohet se këta shtetas janë dëmtuar me mjet prerës në lagjen ‘Qemal Stafa’, gjatë një konflikti të çastit”, njofton policia.
Forcat e rendit kanë nisur menjëherë hetimet për të zbardhur rrethanat e ngjarjes së rëndë, identifikimin e autorëve dhe motivet që çuan në konflikt. Policia po punon për të sqaruar çdo detaj dhe për të parandaluar incidente të ngjashme në të ardhmen.
Ngjarja vjen si një paralajmërim për rritjen e incidenteve mes të rinjve, ndërsa qytetarët shprehin shqetësim për sigurinë në qendrat urbane.
