Pas fërshëllimës së fundit të Anthony Taylor në ndeshjen mes Polonisë dhe Kombëtares Shqiptare, skuadra kuqezi përjetoi një zhgënjim të madh, aq sa disa prej futbollistëve vendosën të mos flisnin përpara mediave.
Njëri prej tyre ishte edhe Elseid Hysaj. Mbrojtësi shkodran vendosi të thyejë heshtjen vetëm një ditë pas disfates përmes një postimi në rrjetet sociale. “Ëndrra ndaloi, por jo dashuria për këtë komb, për këta tifozë, për këtë fanelë”, shkruante Hysaj, duke marrë mbështetjen e futbollistëve të tjerë të Kombëtares që komentuan mesazhin e tij.
Reagimi nuk mungoi as nga sulmuesi Myrto Uzuni, i cili edhe kur foli përpara medias nuk mundi të fshihte trishtimin e tij. Në Instagram Story, Uzuni ndau emocionet e tij: “Ndonjëherë futbolli të jep gëzime të mëdha, e ndonjëherë të thyen zemrën. Nata e së enjtes ishte një nga ato që do të donim të harronim, por nuk mundemi. Ëndrra jonë për Botërorin dhe dhimbja është e madhe. Nga fillimi deri në fund kemi dhënë çdo gjë, kemi mbrojtur flamurin dhe kemi dhënë çdo sakrificë. Sot jemi të mërzitur, por mbi të gjitha krenarë, sepse kjo fanelë nuk është thjesht futboll, është zemër, flamur, identitet. Ëndrra mbaroi për këtë herë… por dashuria për Kombëtaren nuk mbaron kurrë. Do të rikthehemi më të fortë. Forca Kombëtarja!”
Mesazh i kuqezinjve për tifozët është i qartë: zhgënjimi është i madh, por pasioni dhe përkushtimi për flamurin nuk do të ndalen.
