Shqipëria renditet e dyta në Europë për përqindjen e popullsisë që përballet me probleme të strehimit, sipas të dhënave të Eurostat për vitin 2023. Me 12.7% të qytetarëve që jetojnë në kushte të pasigurta strehimi, vendi lë pas vetëm Turqinë, e cila kryeson me 19.7%, ndërsa mesatarja e Bashkimit Europian mbetet rreth 4%.
Të dhënat tregojnë një realitet shqetësues: gati një në tetë persona në Shqipëri përballet me mungesë serioze të strehimit të përshtatshëm dhe të përballueshëm. Kjo situatë bëhet edhe më paradoksale në një kohë kur vendi po përjeton një boom ndërtimesh, sidomos në zonat urbane dhe bregdetare, ndërkohë që popullsia rezidente po vjen në rënie.
Krahasuar me vendet e Europës Perëndimore dhe Veriore, diferenca është e thellë. Në shtete si Malta, Finlanda, Holanda apo Zvicra, vetëm më pak se 2% e popullsisë përballet me probleme të ngjashme. Edhe në rajon, Shqipëria paraqitet në pozita më të pafavorshme se Serbia dhe Maqedonia e Veriut, ku ky tregues është rreth 7%.
Ekspertët e lidhin këtë situatë me nivelin e ulët të të ardhurave dhe mungesën e politikave efektive sociale për strehimin. Ndërkohë, rritja e shpejtë e çmimeve të qirave po e përkeqëson më tej situatën. Vetëm në nëntor 2025, qiratë u rritën me 6.7%, duke u bërë faktori kryesor që ndikoi në inflacion, madje duke tejkaluar edhe çmimet e ushqimeve.
Strehimi i përballueshëm po kthehet në një sfidë gjithnjë e më të madhe për familjet shqiptare, veçanërisht për shtresat më vulnerabël.
