Modelja dhe stilistja e njohur Sofia Richie tërhoqi gjithë vëmendjen në ngjarjen e madhe të modës “Vogue World 2025” në Los Angeles, ku u shfaq me elegancë duke treguar barkun e saj të rrumbullakosur nga shtatzënia e dytë. Ajo ishte e shoqëruar nga bashkëshorti Elliot Grainge, me të cilin pret fëmijën e dytë.
27-vjeçarja zgjodhi një pamje klasike me një pallto të gjatë blu nga Tommy Hilfiger, xhinse të çelëta dhe këpucë të zeza elegante. Flokët bjonde i mbajti të kapura pas, ndërsa grimi i lehtë me ton rozë dhe ndriçim natyral i dha një shkëlqim të butë e delikat.
Eventi u mbajt në studiot Paramount Pictures, ku morën pjesë edhe emra të njohur si Kendall Jenner, Nicole Kidman dhe Angela Bassett, të cilat ndoqën sfilatat kryesore të mbrëmjes.
Sofia e shfrytëzoi rastin për të promovuar edhe linjën e saj të modës “SRG Atelier”, të lançuar më 16 tetor, duke ndarë një selfie nga pas kuintave me ndjekësit në Instagram.
Kjo paraqitje vjen vetëm dy javë pas konfirmimit të shtatzënisë, ndërsa ajo dhe Elliot janë tashmë prindër të vajzës së tyre njëvjeçare, Eloise. Në një intervistë të mëparshme, Sofia ka folur hapur për sfidat pas lindjes dhe për periudhën e rikuperimit, por tani duket më e lumtur dhe e sigurt se kurrë, duke balancuar në mënyrë perfekte famën, familjen dhe modën.
