Një studim i publikuar në Journal of Health Psychology nga studiues të Florida Gulf Coast University ka nxjerrë në pah një lidhje interesante mes nivelit të inteligjencës dhe prirjes për të kaluar kohë në qetësi, pa shumë aktivitet fizik. Sipas kërkuesve, njerëzit që shfaqin më pak dëshirë për të qenë aktivë gjatë gjithë ditës, në fakt mund të jenë më të zgjuar se ata që nuk ndalen së lëvizuri.
Studimi, i udhëhequr nga profesori Todd McElroy, përzgjodhi një grup pjesëmarrësish përmes një testi të shkruar, me qëllimin për të ndarë individët në dy kategori: ata që shijojnë mendimin dhe aktivitetet mendore stimuluese, dhe ata që i shmangen këtyre situatave. Këta të fundit shfaqin më pak të ashtuquajturën “nevojë për njohje” (Need for Cognition – NFC).
Rezultatet treguan se individët me një nivel të lartë të NFC-së kalonin më shumë kohë duke reflektuar dhe angazhuar mendjen në mënyrë aktive, gjë që shpesh përkthehet në më pak nevojë për aktivitete fizike apo stimuj të jashtëm. Ndërkohë, ata me më pak interes për sfida mendore priren të kërkojnë më shumë lëvizje fizike për të shmangur mërzinë.
Ky studim sfidon stereotipin se njerëzit më pak aktivë janë dembelë, duke sugjeruar se ata thjesht mund të kenë një botë të pasur të brendshme dhe të shijojnë procesin e të menduarit.
