Kur ishte 82 vjeç, Florene Shuber nisi të pengohej e të binte shpesh. “Të moshuarit nuk e kuptojnë se po bien derisa të jenë rreth një inç larg tokës”, tha ajo për Washington Post. “Kjo më frikësoi vërtet. Ndodhi dy ose tre herë dhe më bëri të mendoj çfarë duhej të bëja.”
Zgjidhja e saj? U regjistrua në një palestër lokale dhe sot, gati një dekadë më vonë, ajo vazhdon të stërvitet dhe ndihet më mirë se më parë. “Shëndeti mund të përmirësohet. Sigurisht që e kam parë këtë tek vetja. Por kërkon përkushtim dhe qëndrueshmëri,” thotë ajo.
Një studim i ri nga Universiteti i Torontos, i publikuar në revistën PLOS One, konfirmon përvojën e Shuberit: edhe pas moshës 60-vjeçare dhe me sfida shëndetësore, njerëzit mund ta përmirësojnë ndjeshëm cilësinë e jetës. Siç thotë autorja kryesore e studimit, Mabel Ho: “Nuk është kurrë vonë”.
Studiuesit analizuan të dhënat e mbi 51,000 kanadezëve për një periudhë 20-vjeçare dhe zbuluan se ushtrimet fizike, një dietë e shëndetshme dhe gjumi cilësor ishin çelësat për një plakje të shëndetshme. Madje, mbi 8,000 persona kishin përmirësuar gjendjen e tyre shëndetësore ndjeshëm brenda tre viteve.
Dy faktorë të tjerë ishin vendimtarë: shëndeti mendor i mirë dhe lidhjet sociale. “Nuk ka nevojë të jesh shumë ekstrovert për t’u rritur mirë”, thotë bashkëautorja Esme Fuller-Thomson. “Mjaftojnë një apo dy miq të dashur.”
“Nuk është kurrë vonë për të adoptuar një stil jetese aktiv dhe të shëndetshëm,” thekson Ho. “Nëna juaj ndoshta ua ka thënë këto gjëra më parë dhe kishte të drejtë.”
