Një zhvillim i rëndësishëm ka ndodhur në hetimet për vrasjen e 22-vjeçares shqiptare, Ilaria Sula.
Pas 21 ditësh nga gjetja e trupit të saj, karabinierët kanë arritur të sekuestrojnë celularin e viktimës, i cili u gjet në banesën ku ndodhi krimi, në rrugën Homs, në lagjen afrikane të Romës.
Ekspertët e hetimit pritet t’i nënshtrojnë telefonin një analize të detajuar, pasi dyshohet se përmban të dhëna të rëndësishme për zbardhjen e rrethanave të ngjarjes.
Dyshohet se autori, Mark Samson, ish i dashuri filipinas i Ilarias, ka përdorur celularin e saj pas vrasjes për të dërguar mesazhe familjarëve dhe për të bërë postime në rrjetet sociale të saj, me qëllim manipulimin e perceptimit për vendndodhjen e saj.
Sipas autoriteteve italiane, Ilaria Sula u vra me thikë më 25 mars në banesën e Samsonit, ndërsa prindërit e tij ndodheshin gjithashtu në shtëpi në momentin e ngjarjes.
Pas vrasjes, autori e futi trupin e vajzës në një valixhe dhe e hodhi nga një shkëmb në afërsi të Bashkisë Poli. Trupi i saj u gjet më 2 prill, shtatë ditë pas zhdukjes.
Ilaria ishte studente në Universitetin “La Sapienza” të Romës dhe vrasja e saj ka tronditur opinionin publik në Itali dhe në Shqipëri./REFORMA
