Më 27 janar 2025, në Gjykatën Themelore në Prishtinë do të mbahet shqyrtimi fillestar ndaj Naim Murselit, Granit Plavës, Kushtrim Kokallës dhe Tom Dodajt, të cilët akuzohen për vrasjen e 30-vjeçares Liridona Ademaj.
Zëdhënësja e Gjykatës Themelore, Mirlinda Gashi, ka konfirmuar për TV Klan se seanca do të mbahet në orën 11:00 të datës 27 janar. Prokuroria Themelore në Prishtinë ka përfunduar hetimet dhe ka ngritur aktakuzën për të akuzuarit.
Sipas aktakuzës, Naim Murseli, ish-bashkëshorti i Liridonës, akuzohet se ka organizuar vrasjen e saj më 29 Nëntor 2023. Granit Plava akuzohet si doras, ndërsa Kushtrim Kokalla, ish-pjesëtar i Forcës së Sigurisë së Kosovës, akuzohet se ka ndihmuar në realizimin e krimit.
Liridona Ademaj u vra më 29 nëntor të vitit 2023 në fshatin Bërnicë të Prishtinës, duke u inskenuar si një grabitje e armatosur. Rasti ka ngjallur reagime të forta dhe shqetësim në opinionin publik.
