Një ngjarje e rëndë ka ndodhur mbrëmjen e sotme në Tiranë, ku një person ka humbur jetën pas një sulmi me armë zjarri. Shtetasi Bujar Nasufi, rreth 56 vjeç, është qëlluar për vdekje në drejtim të automjetit të tij, rreth orës 20:40, pranë “Pallatit me Shigjeta” në rrugën “Myrte Zeneli”.
Autorët duket se kanë arritur të largohen me shpejtësi pasi e kanë qëlluar burrin hipur mbi një motor dhe pasi e vranë, u zhdukën në pak çaste duke marrë drejtimin në Selitë.
Policia tha se mbi viktimën ishte qëlluar gjashtë herë pasi në vendngjarje u gjetën gjashtë gëzhoja.
Pas ngjarjes, policia ka dërguar një grup hetimor në vendngjarje dhe ka nisur hetimet për sqarimin e rrethanave të krimit, si dhe për identifikimin dhe kapjen e autorëve të dyshuar. Po ashtu, janë ngritur pika kontrolli dhe shërbimet e policisë po ushtrojnë kontrolle në zonë për të lokalizuar dhe kapur autorët.
Viktima, së bashku me vëllanë ishte pronarë i një mobilerie në zonën e “Pallatit me Shigjeta”, zonë ku iu bë dhe atentati.
Dyshohet se në momentin që është qëlluar, sapo ka dalë nga biznesi. Dëshmitarët kanë parë mjetin e viktimës të ndaluar.
