Babai i Martin Canit, Ëngjëll Cani, ka dhënë dëshmi këtë të mërkurë në Policinë e Tiranës, lidhur me vrasjen e djalit të tij pranë Shkollës “Fan Noli” në Tiranë.
Cani ka deklaruar se nuk ka qenë i informuar nga shkolla ose nga ndonjë institucion tjetër për një konflikt të mundshëm që djali i tij kishte pasur me autorin e vrasjes, katër ditë para ngjarjes. Ai ka thënë se mori informacion për ngjarjen vetëm pasi Martini ishte dërguar në spital, dhe bashkëshortja e tij u njoftua për këtë situatë.
Duke folur për hetimet, Cani ka shtuar se nuk ka pasur njohuri për ndonjë konflikt të djalit të tij që mund të lidhej me ngjarjen, dhe as nuk ka pasur kontakte nga familja e autorit të vrasjes pas incidentit. Po ashtu, ai ka marrë sendet e sekuestruara të djalit të tij, përfshirë çantën e shkollës me libra, që u morën nga vendi i ngjarjes më 18 nëntor. Dëshmia e tij po përdoret në hetimet që drejtohen nga Prokuroria e Tiranës për të zbardhur plotësisht ngjarjen.
