Numri i të dyshuarve në hetimin për vdekjen e Liam Payne është rritur në pesë, pasi dy punonjës të hotelit CasaSur në Buenos Aires janë vendosur nën hetim zyrtar. Këta dy punonjës përfshijnë recepsionistin që ka telefonuar 911 kur ka ndodhur aksidenti dhe një tjetër person që ka qenë ndër ata që e kanë shoqëruar këngëtarin në korridor pak para ngjarjes tragjike.
Një foto tronditëse, e cila tregon sjelljen e stafit të hotelit, ka ngjallur shqetësime, duke përfshirë edhe vendimin për të mos e lënë Liam Payne-n në holl derisa të arrinte ndihma. Sipas portalit argjentinas Infobae, gjyqtarja Laura Bruniard ka marrë vendim për të përfshirë këta dy punonjës në hetim dhe ka urdhëruar që ata të angazhojnë avokatë për mbrojtje. Ata pritet të merren në pyetje nga autoritetet javën e ardhshme, mes datave 17 dhe 19 dhjetor.
Prokurorët po shqyrtojnë mundësinë e ngritjes së akuzave për vrasje nga pakujdesia ndaj këtyre punonjësve, pasi janë filmuar duke nxjerrë Liam Payne-n nga holli i hotelit pak para se ai të bie nga ballkoni i katit të tretë më 16 tetor. Zyrtarët kanë përjashtuar mundësinë e vetëvrasjes, duke pohuar se Payne ka mundur të ketë qenë pa ndjenja kur ka rënë, duke u bazuar në mungesën e “reflekseve të mbijetesës”.
